تلوعنة وشفنه كل حلاوتهم ومرهم
والروح تمشي على طوعهم وأمرهم
حبيبي دوة لجروحي ومرهم
تمنيتة يجي ويحن علية
همت وانسلب عكلي وزاد مرضاي
على المر ماشفت شخصة مر ضاي
لون بات الترف بحشاي مرضاي
لكه اكرب يهل مبعد علية
بسك لا تضل تشكي بهاماك
وتلوم العين وتعضعض بهاماك
اخذ طبع النخل وارفع بهاماك
واذا بالطين عركك هاي هية
لو ردت الحبيب اتشوفه ينشــــــاف
وطيبلك جرح بضــــــــمادة ينشـاف
اخبرك بل حبيب اشلون ينشـــــــاف
بس ضيف الايميل وهاي هيــــة
سماح اطلب انا المنكم وهدنــــة
كمش بيد التعورنة وهدنــــــــة
جبل راكَع خجل جيتك وهدنـــــــة
اصير اتراب وانتة اسحكَ علية
وحك رمضان وأشرافة وكتبة
عليك يهل دمع عيني وكتبة
انة شماريد أهم خطك واكتبة
شدهني جفاك من غصبن علية
وحگ اعيونك ورسمك وداعك
وحگ جلماتك الحلوة وداعك
يصاحب فرهَد ابروحي وداعك
انتلف ثلثين والباقي باذية
تعال اسمع ون النايات وون عود
يخويه امشي نرد للوطن ونعود
اذا باجر متت بالغربة ون عود
وتظل ابعيد عن ارض الوطية
تلوج الروح ياأحبــابي وراكم
وعجاج الضعن سد عيني وراكَم
يدمرني الحلم بيكم وراكم
ويريت الحلم واليقــضة سوية
وسط گلبي يظل طابع وسمهة
عسل صافي حلو مرها وسمهة
صفيت متيه باسمي واسمهة
لان هية النجم واني الثرية
الدنيا خلافك وحشه ومرة
ولا منك بعد جية ومرة
صورك مرة اضمنها ومرة
اشوفنها توج نيران بية
احبة وما احب واحد بدالة
وياذنب البدة مني وبدالة
الك منصوب بكليبي بدالة
خطك على النبض يشتغل بية
