يطارش لو رحت لهناك مرهان
وخبرهم تراني بسجن مر هان
ان كان الزاد عندكم حلومرهان
شحلات الزاد لو نكعد سوية
******************************
جروحك للشمس ياقلب شرهن
وليالي السهر ماينحمل شرهن
الك عمري رهنتة بعد شرهن
اذا حتى العمر ماعاد الية
********************************
حبيبي مابدله بالذهب لو مال
وصيرله سند للحمل لو مال
خاف تقول تعب مني لو مل
اظل وياك لاخر نفس بية
******************************
نشم عطرك يغالي من هوانة
ونحب كلمن يحبنة ومن هوانة
اشتظن نقدر نعوفك؟ منهو آنة ؟
لو عفتك مصيبة تحل علية
******************************
حبك بالضلع مسمار مندق
وحس قلبي يسولف بيك من دق
كمت اركض على الجوال من دق
لان ادري العزيز اتصل بية
*****************************
يغالي الذهب مايرهم وصف لك
وكتب شعر من قلبي وصف لك
تعال بقلبي مدرستك وصف لك
اذا تاخذ صفر اني انطيك مية
******************************
سلامي للولف يا طير وصلة
احبه من صدق محتاج وصلة
كريم النسب وابن شيوخ اصلة
ابن عز وكرم غالي علية
******************************
يا عاذل لا تعذل النفس خلها
ولعلها تموت من بعد فراق خلها
لزم ايدي الطبيب وصحت خلها
المرض وسط القلب ما هو بايدية
******************************
هلا بالما نساه القلب مرة
وصدق كل ليالي جفاك مرة
شيضرك بالحلم لو تمر مرة
حبيبي انت وتظل غالي علية
******************************
سهول الناس عندي وانت راسي
سفن غرقت في بحري وانت راسي
اخوي انت وصديقي وتاج راسي
واعز منك تراه ماكو علية
******************************
جمد كلبي على بابك مو عجيبة
عجبته وكلشي غيرك مو عجيبة
تره السبع العجايب مو عجيبة
صفر وي كارثة فركاك الية
******************************
دمع عيني يحلو الطول هامل
شجاك الحبي يالمحبوب هامل
اذا فد ازعلك كول ها.مل
امل منك جذب يالعشت بية
******************************
غيرج ما حله بعيني ولا طاب
ولا دونج دخل كلبي ولا طاب
يجرحي وياج لا هود ولا طاب
دم ينزف ولا تدرين بية
*****************************
عليج الروح راحت من يردها
و وكيحه همومي صارت من يردها
خطيه الروح ملت من يردها
لان بس الصبر يبسل علية
******************************
صحبتك ليش قصرت ما طلتها
وانه الدنيا علمودك ما طلتها
جنتلك فرصه سهله ما طلتها
خسرتني بسبب بطرانك علية
******************************
امش مملوح غيرك يمشي فاهي
وعجز يوصل لوصفك يم شفاهي
لون توصل شفاهك يم شفاهي
الزك لو تحط جيلات بية
*****************************
صديق الفاضلك بالطيب فضلة
ومثل ما فضلك عالناس فضلة
اشكره مو جزاته انكار فضلة
يجيليك يوم هم تحتاج فية
********************************
اذوبن لو شفت مرة خيالج
اريد بلا شعور ادخل خيالج
انتي مهره وانه الجايج خيالج
وعلى درب العشك تمشين بية
*****************************
اجذب الكال عنك ومرة شفتك
العسل لسه بشفافي من رشفتك
الحذر لو ويه غيري مره شفتك
انتحر بيك واموتك بين ادية
******************************
كثير الهم على قلبي تراكم
وقصرتم وياي ياحبابي تراكم
كود العين كل لحظة تراكم
ولو بالطيف مرتكم علية
