الابراج التحشيشية 2011
احم احم
برج الحمل ( الصخل )
يتميز اصحاب هذا البرج باسلوب كلام مميز (لوگي) والتركيز على الهدف ( مثل كرستيانو رونالدو) ويتميز بواقعية وصلابة (صبة كونكريت )
... يحب التوفير (عص كلش وبطنة خايسة من الفلافل ) عنيد (ابو طنگورة) صابر متوازن (مخلي بجيبة حصو) هدوء في التفكير (بارد ابرد من الثلج) واضح (...تگول شاشة ال جي )
برج الثور ( الهايشة )
يتميز اصحاب هذا البرج اول شي بحب المادة (يبيع امة وابوه ع الفلوس) وبالاستبداد ( متاثر بكاظم الساهر) والثبات على الراي (من يگول لا يعني لا ) ولكنه يحب عمله (روحة ومذهبة الشغل) وسريع البديهة (يلگفها وهي طافرة) ويكون متساهل دائما مع الحبيب (ميدري شيصير من وراه) يحب الملابس وخاصة الجديدة منها (يعني البالات )
برج الجوزاء ( الكرزات )
يتميز اصحابه بحب الاطلاع (حاشر خشمة ابكل شي ) مثقف ( يقرا ويكتب) مثالي ( مو ممثل يعني) ديناميكي ( دائما ً اسمعها بس ما اعرفها شنو ) يحب الثرثرة (من يحجي ميسكت الا من تطفا الكهرباء) قلق ( يمشي ويتلفت) قليل التركيز (يمكن ممتريك) لا مبالي ( ميدري بالدنيا شبيها ما بيها )
برج السرطان ( ابو الجنيب )
يكون اصحاب هذا البرج منفتح في علاقاته ( ابو درب ) يحب الكلام ( لغوي ) سريع في اتخاذ القرارات (بدون تفكير) لذلك ترى اكثر قراراته خاطئة ( دومة متورط) فضولي (يريد يعرف كل شي )حشري (وخاصة البنات ) حب الظهور (لازم اربعة وعشرين ساعة اون لاين )
برج الاسد ( السبع )
محشش ( عايش بغير عالم) دائما شارد الذهن (يصفن هواية) خشمة چبير ،راسة چبير لديه عاطفة منغولية ( يعني منغولي ) ميثق بواحد حتى بأبوه يعشق الحرية (دايح) سبع ويسوي مشاكل هواية اخو خيتة ومع ذلك هو بطيء الفهم يعني مطفي من الرئيسي ، لا يعرف كيف يتصرف مع الحبيب دوم يچفص
برج العذراء ( العانس )
مستقر في عمله (گاعد على كرسي) اموره العاطفية دائما موفقة (اموره ماشية) مبذر (مضيع فلوسة على كل شي) لديه حساسية عالية (بيه جرب) يحب المناقشة والجدال (الاتجاه المعاكس صاير براسي) ولديه دهاء (خبيث يعني ) مرح اربعة وعشرين ساعه فاتح حلگة رومانسي (دائما يتابع روتانا سينما) لديه انسانية ورقة (مثل تامر حسني )
برج الميزان (الگبان )
يمتلك اصحاب هذا البرج عاطفة كبيرة (الحنية تگطر من كل مكان) وهدوء (من يحچي ابد مينسمع) وتضحية (يمكن متاثر بكارتون گرندايزر) وحب المساعدة (مايخلي فقير ما يخمطة) وفاء (وفاء عامر) وكثيرا ً ما يوكل اعماله الى الغير (يعني عجوزي بالشغل) يحب اللعب والمرح ( يلعب دعبل) يخاف من المواجهة (جبان )
برج العقرب (يمة گرصتني العگربة )
يحب اصحاب هذا البرج المشاركة (البيدة مو الة) كريم (حاتم الطائي) يحب الاثارة (احمد السقا بفلم المافيا) حنون (گلب والدة) متدفق تگول (بوري مكسور) يحب الالتزام ولا يكذب (من يواعدك بالسبعة الصبح يجيك بالستة العصر ويگلك صارت عدنة فاتحة) لديه حساسية زائدة ( خاصة من بيض السلگ) لكنه مزاجي (مزاجة برتقالي )
برج القوس (السهم الاحول )
دائما مايكون عصبي المزاج (دوم يصيح عالزغيرة والچبيرة) كسول ( ميگوم من مكانه لو طگت يمة مفخخة) متسرع (شاد محرك مال واوي) ( دير بالك تحچي وياه)لا يحكم عقلة في اكثر الامور (مطفيه ومخليه على صفحة) لذلك تراه دائما ما يقع في الخطأ (دومة غلطان ) لديه حب الذات (شايف نفسة شوفة) لكنه يحب الخير للناس (على نياته )
برج الجدي ( الخروف ابو گرون )
لا يتعض من الماضي(اذا اكو حفرة اباب البيت كل يوم يوگع بيها) بعيد عن الواقعية (يعني مثل الافلام الهندية لگة طفلة على الرصيف رباها وكبرها طلعت امة) مبالغ في الدلال (مثل نانسي عجرم) يستجيب بسرعة للضغوط ( اول راشدي يگول اني فجرت وزارة العدل) يعشق بسهولة (كل شوية يحبلة وحدة) يقدس الصداقة (اذا گلة صديقة ذب روحك بالنار يذبها) يتصرف بلا عقل احيانا( يچفص )
برج الدلو ( السطلة )
متغطرس (صاير ابو جاسم) شايل خشمة ليفوگ ، صاير هوسة ملابسة بصفحة وكتبة بصفحة ، مبذر (فلوس متبقة عندة) ، عدائي (مثل الذيب)عصبي ثري فيز، حاد الطباع (خبل) غير مسؤول (مالة علاقة شيصير وراه) لا يحب المساعدة (يجي يوم ويوگع ) ولكنه عندما يعشق يعشق بجنون (مثل جاك بالتايتانك) ويضحي من اجل الحبيب (مو گلنة مثل التايتانك) ولن يخدع بسهولة (دوم مضروب بواري )
برج الحوت ( البني والگطان )
يكون صاحب هذا البرج لديه طموح جامح (يريد يصير رئيس وزراء يمكن) يفعل اي شيء من اجل طموحة (يحرگ الدنيا بس يوصل) يحب السيطرة (سيطرة مال حرس وطني) سريع الزعل (اول ماتشاقة وياه يزعل)وسريع الرضا (بسرعة يتقشمر) يصدق كل شيء يقال له (مو عاقل) كثير الثقة بنفسه (فان دام )
