عفية شعب...
بيه العجايب مو عجب
جمعة ندم..
جمعة غضب
انواع عدنة من الجمع
كل وحدة عنوان وخطب
جمعة صمت
جمعة شغب
جمعة حواسم بالبلد
جمعة سلب
عفية شعب...
مرة لطم...مرة لعب
مرة يصفك للصنم
مرة يشجع المنتخب
عفية شعب..
نايم على آبار النفط
ولهسة يطبخ بالحطب!
عفية شعب ..
مثل الجمل
عاكول ياكل للاسف
وشايل على ظهرة ذهب !
عفية شعب..
حتى بوكت بيدة الأمر
تيّه احسابة وما حسب
وحتى البعض من أمّنه
ونطاه صوتة وصعدة
بس يوصل الكرسي كَلب
نهرين عنده وما زرع
والغربة بيه زرعت رعب
.عبوات ..والغام ..وحزم
ما قصروا اهلي العرب
دم ومآتم حمّلت
وصار الحصاد من الركَب
يابو لهب..
دزلنة من عدكم حطب
وارتاح لتشيل الحمل
حماله عدنة اعله الطلب
بس يا شعب...
معذور من صابك تعب
ثلاثين مرن بالألم..
بالجوع مرة.. وبالحرب
جيش القدس
جيش الفرس
جيش السما
جيش الارض
وجيوش انواع ورتب
بس يا شعب لا تستلب
فك عينك وشوف الدرب
ميز العدو ..من المحب
ميز الصدك ..من الجذب
ركز عدل..
من تنتخب
الشغلة لازم تنحسب
هذا عدل ..لو مو عدل ؟
اصل وفصل..لو بس شكل ؟
من الكتل
من النخب؟
بس للوطن..لو للحزب ؟
ميهمك شلابس بعد ..
قاط اجنبي
صاية وعكَل
اعمامة وبشت
المهم شايلة عقل
والمهم ميبيع البخت
والمهم ..والكلش اهم
صادق يحافظ عل الشعب
