اجر حسباتي بيك وبيك اسولف دوم
واتاني الليل يطلع يعد حسباتي
واصفن بيك اشوفن صورتك بالعين
وتالي الكاك صفنة بضمن صفناتي
واساهرلك ليالي واكعد وي الضيم
......والكاك آنة ونه بين وناتي
والاعب طيفك الغافي اعله رمش العين
وبس افتح جفوني تزيد لوعاتي
مو جيف آنة احبك دوم افكر بيك
بس جيف انت صاير ضمن صفناتي
لو حتى القلم يعجز يخط حروف؟
اخطلك دمع عيني بوسط ورقاتي
واذا اكولن احبك
تدري ما وفيت؟؟
اكثر من احبك اني احبنك
وما اكولن اريدك لأن كلك طيب
بية وبعد صدك ما اطلعنك
واكتبلك شعر واسهرلك اني الليل
واشوفك يمي ذايب شمعة اشعلنك
واصيرن خيط غافي بنصك يموع
واذوبن بيك انه وما اذوبنك
واريد احجيلك العندي
ياخذني الخجل منك
لوكلبي يضم اعليك؟
عيوني تكول احبنك
واحس النار بضلوعي يوم الما اشوفنك
وادوخن دوخة التعبان
لو يمي حجوا عنك
واذا رادوك بعض الناس؟
اصيح بصوت اريدنك
اصد عنك
امل منك
جذب من كال اعوفنك
لو حطوا بدربي النار؟
ادك بابك واشوفنك
شتريد تطير؟
طير
هم تحط واصيدنك
شتريد تصير نجم بسماي؟
هم تلمع واشوفنك
تريد تموت اموت وياك
وكبل منموت اصيحن حيل احبنك
