منتديات اشرف علي ملك الرياضة

منتديات عامة
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 مكتبة الأبوذيات

اذهب الى الأسفل 
كاتب الموضوعرسالة
Admin
Admin


ذكر الثور عدد المساهمات : 2156
نقاط : 6175
السٌّمعَة : 0
تاريخ التسجيل : 30/06/2011
العمر : 27
المزاج : عصبي والله اليستر

مُساهمةموضوع: مكتبة الأبوذيات    الإثنين يوليو 04, 2011 4:53 am

مكتبة الأبوذيات


يهل ناديت بسم هواي عيدة
اويهل ماخذ دليلي اوياك عيدة
الگلب مو بس بعد رمضان عيدة
عندي العيد من نگعد سوية


مرارتنة يصاحب مرها منكم
وآنة المعلول وابحث مرهم الكم
تدري ليش آنة مرهم الكم
آنة ارهم لابو اطباع الوفية


هاك اشعل گلب گلبي وجهاك
اعلة حالة راح اعلمنك وجهاك
بشالك من تلف شعرك وجهاك
تلف روحي مثل لف المنية


كلمن گال سوف اعمل وسبني
چنة بحچية شتمني وسبني
أگلة من الوطن إطلع وسبني
آنة ابني الوطن بثنين ادية


طبع اليحفر بصحراء يعراﮒ
ومن طبع الشجر بالطين يعراﮒ
ومن طبع العراقي ايصيح يعراﮒ
إلك يغدي العمر فدوة وهدية


أشد حبل الوصل والگاه محتال
بسبب لن التريده الروح محتال
سكن گلبي ورضيت ايكون محتال
وجبتله الكرسي ريسته علية


يظل غامض سؤالي اوياك منحال
وجسمي من السهر وياك منحال
وحياتك صرت يبن الناس منحال
العسل حصتك وآنة اللسعات بية


يحلوة الطول من تمشين بالراح
بمشيتچ مو طحنتي الگلب بالراح
تعذبت وصفگت الراح بالراح
وراحت روحي من مريتي بية


علي دنياي صبت غيض چزيت
وروحي من القهر والضيم جزيت
عشرتك والإسم فد نوب چزيت
السبب مديت إيدي وعطت بية


تعال اگعد نصفي الإلك ولي
علية انوب ياهي تريد ولي
گتلة خل ابوسك گال ولي
شنهي تبوسني وتنگ علية


شفكن من هواكم بعد شفتك
وعلي طفر عسل من حچت شفتك
طحت كلي اعلة كلي بيوم شفتك
دگضني مو طحت كلي علية


عليل ومن بست شفتك شفتني
ولتگلي العشگ فتك شفتني
اذا كلك طحت لمن شفتني
أنه اتوذر إذا تخطف علية


مريض آنة وصعد مرضي على اشفاي
وطب لندن فلا يلحگ على اشفاي
حبيبي من تحط شفتك على اشفاي
أطيب وكل مرض مايضل بية


صرت كلي جرح بجفاك ودي
وشوفك كل مسه ومصباح ودي
إذا خلص رصيدك علي ودي
أمد شريان وانتة اتصل بية


جمال وچان عندك كله فتنة
واجب رغم حچيك كله فتنة
تدري اشگد فرگتك كلفتنة
مثل الراح دفان بأخية


هله ياللي عشرتي اوياك_مأسات
إلك خدين بيض أتگول ماسات
أسكر لو شفاي شفاك ماسات
واذوب ومايظل كل حيل بية


وحگ الألف والآمين والها
ابعدها ماتسله الگلب ولها
الشمس صارت مناصف إلي والها
بخدها النور وآنة النار بية


يون بسمك دليلي انتة وانتة
تاه وأرد اسألك انتة وانتة
يحب اثنين غيرك انتة وانتة
تركني وإنتة بس ضليت بية


زرعت الدرب لجلك وردة وردة
وعذب منهل ودادك وارد اوردة
مثل يعقوب حالي ورده وردة
لاردلي القميص ولاألة جية


من زغري الحزن والضيم چلباي
ويروحي بحبل صبرﭺ حيل چلباي
أكل عظمي او وفة وياي چلباي
وبعضهم أكل لحمي وخان بية


وحگ من ذا الذي أسرى ولعراج
على الشينات ماردن ولا اعراج
العتب مو على الما يمشي والعراج
العتب على الصاحي ميسويلة جية


طحت مابيه حيل اعدل ولا اعوج
ودليلي ابنار لهابة ولع وج
اتشمت بيه الصاحي والاعوج
وغمان الوكت سولفوا بية


حبيبي بيا بخت وياي شديت
وگلي بهجرك شقدمت شديت
إصبعك حتى تذكر خيط شديت
انحصر دمك ولافكرت بية


بعد شتأمن من الخان شرجاي
وعلي غير شمالك صار شرجاي
أعرفك من تجيني اوياك شر جاي
وتطش يمي المصايب واهلية


انياب الدهر عضن من شراها
وبالله ارجوك كفني من شراها
صحت للبيع روحي من شراها
شراها الچان يحلملي بأذية


تبلل ثوب حزني ما شريتة
مشه وريته اعله گلبي ماشي ريتة
حل بية الشراني ماشريتة
شريت الباعني ومارحم بية


احلفت ماأبچي بفراگك ولانوح
وبعد ما ردد بإسمك ولانوح
يوسف مبتلة مثلي ولانوح
ولايعقوب مر مثلي بأذية


أعلن ياگلب حبك وشيعة
واتبع راي كل مخلص وشيعة
عيب حچاية السنة وشيعة
الوطن لاهل الوطن كلهم سوية


آخ اشگد احبنكم واجلكم
وگلبي انشلع من صدري واجلكم
أنة اتمنة يحين اجلي وأجلكم
بگبر واحد يدفنونة سوية


جفيت وخلفت بجفاك عبرات
ونيني وصل سابع جار عبرات
أنه الشاطر عليه اشلون عبرات
مشة وماچلبت بثنين ادية


شجاك شبيك لامريت لايت
وهاي الروح عگبك حيل لايت
يبو عيون الوسيعة تگول لايت
ضرير آنة دحط عينك علية


ونيني لاسنة بطل ولاعام
وسجني خاص الي وحدي ولاعام
أخبرك لا أخو ينفع ولاعم
بس الله العزيز يحن علية


صفت شمس الضحة بالعين ظلماي
حزين ولا بقة بالعين ظلماي
أنة المظلوم محد عرف ظلماي
جفوني العشت وياهم سوية


حرت مابين أتاني ماأتاني
وعدد شماتي يمكن ماأتاني
انتظرتة هواي تالي ماأتاني
ماريدة بعد لو حب ادية


أون ومن ونيني اعضاي خوان
شجاني وماعرفت الوكت خوان
حسافة الچنت اعدهم إلي خوان
صفوا عدوان بعد الصار بية


الدهر بس البراسة اجنون يمنة
غدر بيه وبجاري الچان يمنة
ماتنتصر يسرة بغير يمنة
ولا يمنة وحدها اتحل قضية


الدهر أغضب علية ودار وجها
وبنيرانة چوة احشاي وجها
صديقك لو زلف عالعدل وجها
مو بالعكس تحفرلة ابهبية


جره دمعي على الوجنات ياحيف
على اللي مايقدر التعب ياحيف
آنة الچنت اخوف خفت ياحيف
ولذت بالچانوا يلوذون بية


حنيني اعليك أمك ماتحنة
وظهري لغير شخصك ماتحنة
أسف چفي بمحبتك ماتحنة
تحنة دموم من گلبي الخطية


لاتأشر على الماشي ولتصح
وخوة صدﮒ ماظلت ولتصح
اعضامي أبد ماتبرة ولتصح
أصحة لو يمر ذكرك علية


عيني من الزغر دمعي نغمها
وروحي ما بعد يطرب نغمها
الدنيا اخلاف عشرتكم نغمها
مثل موتة انتمشة اعلة الوطية


علي مرت يناهي ايام سودة
واريد اصبغ اهدومي اعليك سودة
حبك بالگلب والروح سودة
أونن والطبيب احتار بية


كل من شاف حالي أبد مالام
وعرفني وشاف جرحي كلف مالام
صرت مثل الطفل بالمهد مالام
يتيم وعيشته كلش ردية


يهل ناوي على الهجران وك تان
خامك لاتخبطه بصوف وكتان
بالدنيا يمر عالبشر وكتان
وكت راحة اوكت كلة أذية


يلايم لا تلوم الگلب بسعاد
صدﮒ ناس بضليمة وناس بسعاد
يهل گاعد توالي الليل بسعاد
تذكرني بوليفي الخان بية


هلال افراگم روحي وهلها
ودمعتي مرة أكفكفها وهلها
البصرة وكل نواحيها واهلها
الوجودك فرحت وأدت تحية


عذاب الشوﮒ شبگ ساعديني
وساعة انخه الأيمة ساعة ديني
على نص المصايب ساعديني
كلف ظيم العشگ كلة علية


وحگ صفين والخندق وحطين
أملش الراس بغيابك وحط طين
واطير من الفرح صدﮒ وحطين
إذا بالطيف مرة اتمر علية


أخوي اللي ردت وياه نبلة
رماني وشج الي بحشاي نبلة
إذا إحنة امن اهلنا النوب نبلة
اشتظن نرجا الغريب اعلة الحمية


العگل تكين تك انجن وشل تك
بسبب داريتك بزغرك وشلتك
عصرتك عصر بچفوفي وشلتك
لگيتك بس عذاب ونوح الية


بچيت وبالدمع للعين صفيت
اخبطوا ياما اخبطو واشكثر صفيت
يصاحب وية دهري اشبيك صفيت
انطبگتوا اثنينكم عدوان الية


آنة الماعرفت اولك من اتلاك
وياهو البالحسن گبلك من اتلاك
يعشعش وهم بعيوني من اتلاك
كتاب وصعب تفسيرة علية


بصحن شوگك يروحي دوم نطفة
ولا من نار حبك يوم نطفة
أحبك ياترف من چنت نطفة
وكاروكك بتوتي وذني ادية


أشوف العمر لايسوة بلاهم
ولو منهم علي زايد بلاهم
وينه المسعد وعايش بلا هم
واسأله اعلة الفرح ميمر علية


الحزن ماينحسب لو ردت عدة
على المبعد واخذها الروح عدة
يعمري اللي على العشرين عدة
ظلمة وهالليالي تمر خفية


حبيبي لاتظن الدهر سرنة
هجرنه ديارنه وللغرب سرنة
وحياتك ماظهر للغير سرنة
بس دمعي فضحني وعم علية


شمالك بية مافد يوم حسيت
واحس جرحك بماي العين حسيت
تدري بيوم عني ارحلت حسيت
العمر وي روحتك راح من ادية


شجاها عليك خلانك وربعاك
كلهم كلو من طيبك وربعاك
ثلث ترباعك انتة الهم وربعاك
حمه للگاصدك يشكي الأذية


طفل گلبي بغيابك مالة والي
غدة الشيب اعلة راسي مالة والي
عضو من اعضاي وكتي ما لوالي
لچن ضيمك لواني وعم علية


جفوني اغطاك وعيوني وسدلك
أبيع سنيني يالغالي وسدلك
أصيرن فيض عالشامت واسدلك
واصد اسهام عذالك بدية


وحگ الفوﮒ ماتت راس ابيها
يظل حبك بروحي راسي بيها
بعشرتك إذا گطعوا راسي بيها
ولا أتخلة عنك للمنية


يأن الگلب وتأثر بما أن
واظن الروح ماتطفة بماءا
طحت گدامك وگتلي بما أن
طلبت العون مني اتبوس ادية


عدت ياما وبعد كافي شعدلك
واعوج صعب تعديلك شعدلك
خمسة خمسطعش عشرة شعدلك
جزن مليون دگاتك الية


أنه الما كرر بحچيي ولاعيد
ولا أحسب بزلاتك لاعيد
شمالك ماتمر بيه لاعيد
الخلل مدري بجنابك مدري بية


أقدم الروح لحبابي وسلم
واصافح راحتي بچفهم وسلم
يارب العرش صلي وسلم
على المصطفى وآله بكل مسية


إلك مني سلام وألف مرحب
شكثر مرت صداقة شكثر مر حب
وحگ اللي طبر بالسيف مرحب
تظل انتة صديق وأخ الية


جره دمعي على الوجنة وسيلة
على الماصار الي اوياهم وسيلة
أدور المبتلي مثلي وسيلة
المصيبة اعليك مثل العلية


حبيبي بالگصايب يلف وي حيل
بمرضي گالت الشمات وي حيل
وعلى الكلفات أطبگ حيل وي حيل
واصيرن سبع واتحدة الردية


اگطعت خيط الوصل عني والف لاك
ومثلي مايصح يشگر ولف لاك
بألف مليون مابيعك ولافلاك
عجب وانتة برخيص تسوم بية


صديقي ما أبدله بذهب لو مال
واصيرلة سند للحمل لو مال
خاف تگول مني تعب لو مل
أضل اوياك لأخر نفس بية


أجيت اطلب النخوة من نخوتك
لگيتك يمي حاضر من نخيتك
إذا يسألني سائل من أخوتك
أگولن إنتة اخوية وهاي هية


أطوف لخاطرك وافتر بلادين
واعوم بحور دنياتك بلادين
أصبح كافر وأمسي بلادين
ولجلك خل توافيني المنية


أجيب السم بدية ولهمنة
على الناكر هوانة والهملنة
خل الفرح عندك والهم النة
المهم إنتة سعيد وهاي هية


حظوظ الناس حلوة ماله حظنة
ومثل حسنك ياغالي ما لحظنة
كون اليوم شخصك مال احظنة
قسم إسنين ماهدة من ادية


وگع ميزاني بحبك والك دﮒ
وگلبي المايدگـ لحد والك دﮒ
جهازي اتصل من وحدة والك دﮒ
لأن اثنينة انحبك سوية


الشرب من ضاﮒ طعم اشفاك سكر
فقد وعيه وصعدله النوب سكر
بعت من حصتي گونيتين سكر
واخوط الچاي والشفة سوية


لاتظلم دليلي اياك واياك
انة انطيتك وچف الغير وياك
صدﮒ من علية تهد وياك
أهد وافزع واطگ بثنين ادية


هاتعبني حبك هايذاني
دخت هاياصلاتي هايذاني
أگول التوبة ماحب هايذاني
أهد ذاني ويرد حبك علية


عسل وبحلگي وكتي مرجعلكم
ومرجعكم لگلبي ومرجعلكم
صرت آية بهواكم مرجعلكم
خذيتوا منين فتوى وخنتوا بية


إبني اقصور ابد لتظن بنادم
انجرحنه لچن مابين بنادم
إبنها مو شرط يطلع بنادم
إذا حوة اطلعت موش آدمية


اللولة البيك چي مابيك لولة
ملاك من السمة البالمهد لولة
جمالك ماتجاوز بشر لولة
الخمرة اوية العسل طبگن سوية


وحگ الساكنين الشام ويران
عفه عيوني يشوفن بعد ويران
أخابرلك وخطك يدﮒ ويرن
الف نعلة اعلة ابيك رد علية


العجايب سبعة غيرة ماعجبني
وعجبني شلون اگولن ماعجبني
جبن هو وشبگته وماع جبني
ولحد الآن احس مايع بدية


بحة صوتة تكتل منسة بحتة
ويوشل الماي كلة من سبحتة
تشوفه تگول مومن من سبحتة
وهو كلاوي ويلعب علية


هجرك حيل خايب مرضاني
زعلت وعگب شخصك من رضاني
ترض صدري وتگلي مرضاني
ولا چنك سحگت انتة علية


بوادي الشوﮒ احس صوتي دوالك
ودليلي اشموع الك عشرة دوالك
إذا گالولك بكتلي دوة لك
شتظن بدواك روحي تعز علية


شلت منه وتبعني هم لگاني
لگاني وشلگاني هم لگاني
عسل ظنه بعدني هم لگاني
صرت سم وخذت ثارات الية


أريد العشرة انه اطويها ولفها
بسبب لن الغدر بيها ولفها
جروحي الفين احسبها والفها
يعد الفين من تجبل علية


بصفگات وهلاهل ودعاني
وهو الكتل حبنة وادعاني
ودة ابچي وانوحن ودة اعاني
ودة مايمر الفرح بية


من همي الصخور اتموت واذيب
وعلي دنياي تجمع ظيم واذب
إبن آوه انجمع والضبع والذيب
اليطلع الشاة وينة البي حمية

ذكرت احبابي هالليلة وحنيت
وحنة خذت من دمعي وحنيت
صحيح العمر ماخذني وحنيت
أنة هذا وبگت روحي أبية


مشة حادي الظعن بالعيس وحدة
وگلبي شلون يگظي الليل وحدة
اذا غيرﭺ أحب مجبور وحدة
إنتي اوياﭺ احبنكم سوية


نفس واحتاج شمك ياهوانة
العمر ذلة بغيابك ياهوانة
أتيه روحي يمك ياهو آنة
خيالك مرة دلاني علية


تره الدنيا صفت مو دنيه بعداك
ولذت ياريت بالخوان بعداك
أنه امن اذكر الغربة وطول بعداك
أبچي الليل وانجومة علية


أصد وازعل وادير العين طبعن
لأن لچمات الك بالگلب طبعن
حلو وتنحب ولكن بيك طبعين
تشك وتغار من روحك علية


لتظن نار گلبي اعليك تبرد
وبعد كل الحچيتة اوياك تبرد
شوكت ماجيك بالسچين تبرد
دهاك اذبحني هو شضال بية


أشوفك صعب من تعلة شنش بيك
وچنت ملتم علي كلك شنش بيك
علي زعلان شالقصة شنو شبيك
ولاچنك أمس نمت اعلة ادية


أحس الموت واگفلي ويومي
واظن گربت منيتي آنة ويومي
أريد اگعد أنة الليلة وي امي
گبل ماروحن بثوب المنية


گلبي ساعة الك ينبض سعالي
ولاأنسة أبد كلمن سعالي
أسعل شنهي ماتسمع سعالي
وعلى شفافك تحمل صيدلية


أسف منك كل اهمومي والآلام
وجرحي اوياك مايشفة ولالم
ورغم كل هذا ماعاتب ولالوم
وانتة بكل صلافة تلوم بية


گطرة حية آنة واتگصة
يعرفنة النشد عنة والتگصة
إحنة بجسم واحد والتگصة
چفك لاتظن گصيت ادية


أأمرني والبيلك عسلبيك
وعساهن بية يفترن عسة البيك
حنظل لو ضگت خدي عسل بيك
وشفتك للنحل وجبة شهية


أريد امشي نهار الصيف واسعة
على ام حلگ الزغير وعين وسعة
يحفار الگبر بالله وسعة
بلكي اتصير موتتنة سوية


بعد ما أغزل لغيري ولاحوك
لأن لارد اليستاهل ولحگ
غشمة وصوبوك انتة ولاحوك
وعنتر بالحچي صاير علية


بعدك گمت اسوي النوح ويبات
ولا خلي دليلي ايهيم وي بت
الحزن وياي طول الليل ويبات
بفراشي ويسولفلي علية


عميت ولانفع حدي وسني
ولاواحد عرف حالي وسني
سنون الناس عضتني وسني
ماعضني لچن يضحك علية


الملوك احنة الكبار احنة والابطال
وانتو ازغار وانظمكم بالابطال
أخذنة الكاس والدوري والابطال
وحمسناكم بستة عدال مية


أصفن بيك من ظيمي وسه لن
اصعاب البيك ماذلن وسهلا
تگلي بالوجه أهلا وسهلا
واحسك بالظهر سچين بية


وحگ العين ثم اللام واليا
عليك انشد من اللي راح واليا
ولاني هالزمان شلون ولية
واخذ مني العزيز وخان بية


تعجب حتة بعيوبك ولولاك
ويبخته اللي لزم مهدك ولولاك
بوجودك دنيتي حلوة ولولاك
وحشة وخالية من الفرح هية


أهلك من حلات البيك ميتين
ومي مشمش خدودك مرة مي تين
اليبوسك صعد سكرة 200
واذا آنة ارد ابوسك 900


من شفتك رجف گلبي واختلك
وبين اعيوني اظمنك واختلك
كون ايصير أخ لية واخت لك
وگصة بگصة ونحل القضية


الورانه ايظل ورانة مايعدنة
وخسر كلمن بصحبة مايعدنة
الچان الخبز عدة ماي عدنة
باچر يغص من يطي امية


مبلل مايهمني المطر من صاب
وميت مايهمني السهم من صاب
هدف وبساحة الميدان منصاب
ثابت يالتريد الطعن بية


وحگ الريت والياريت والليت
مفرع واندعي من يوم وليت
يوالي من علي بجفاك وليت
وبعد عينك منو العينه علية


حبيبي اجروح الك بالروح حالن
وامس چنت احسن من اليوم حالا
أريدك تنتخيلي وتجي حالا
باچر وين ماتلحگ علية


عليكم من سلام الله ورحمة
وحن اعلة الگلب مرة وارحمة
إذا رايد أجر إنته ورحمة
تعال انطيني بوسة وحن علية


طحتلي بناس عگبك فطراني
ونهر يابس وهجرك فطراني
صوتك وآنة صايم فطراني
منشوفن صورتك شيصير بية


بإلاهك أرد احلفنة وإلاهي
صدﮒ يفلان ناسيني ولاهي
لاهو الموت اخذ روحي ولاهي
تشوف احبابها وترتاح هية


شكثر ضحالك گليبي وفالاك
وتبعتك خيط تتخلبص وفلاك
شسوي شصك بحلگي وفالاك
بظهري وشبچتك طبگت علية


أريد اسأل اعيوني شلون شفتن
جماله ولمن تبسمت شفتين
كون الزملي واجب حرس شفتين
هم احميه وهم نگعد سوية


على گلبي حمامة شوگـ حلت
وزهت دنياني والأيام حلت
أنة اترجاك يااستاد حلت
غلط لو صح متسوة انطيها مية


صب دمعي على الوجنات ياهل
وماتدرون بية اشصار ياهل
صرت عصفور چني بيد ياهل
أهو يلعب وآنة اشلون بية


شهر سيفة الدهر ضدي وسلة
نساني وراح وي غيري وسلة
عنب ماحصلت منة وسلة
طلع ذيب وكتلني اربات ادية


حبك من شفاف الگلب عت باي
ولانوبة اذكرتنة واصلت عتباي
أعتب مانفع وياك عتباي
على ياهي اگطعت وصلك علية


گلبي مافرح عگبك ولاسار
وجدمي ماخطه لغيرك ولاسار
أخبرك مابگت چلمة ولاسر
فضحني الدمع من غصبن علية


حبي إلك مافد يوم ينگص
وليش الصاحب امن ايغيب ينگص
زمن خلة الحديد بخشب ينگص
ويخلي المالة أول بالثنية


أسگي ضماي من اشفاك واردة
يالخدك جميل اتگول وردة
ردية احوالي يبن الناس واردة
إذا بالبوسة هم تبخل علية


بسك يافرح وشوكت شفتك
تطوخت بغرامك حين شفتك
مريض آنة ودواي بطرف شفتك
تصل لشفاي واشفة من الردية


بية اجروح يصعب علي شلها
وجور الوكت كل اعضاي شلها
الدنيا اوياي من غاياب شلها
خذت حيلي وبعد شتريد بية


حبيبي آنة منك وانته مني
واحس كلمن يونلك وانتة مني
إجت احزان دهرك واتمن لي
وصرت يفلان مأوى لكل رزية


تشوف اهمومي بعيونك وترها
وتغيب وتگطع بروحي وترها
يرهيك الوكت يسمر وترها
وتصير انتة أبو الراهي علية


سرة گلبي بدرب حبك ومارد
أصيح وماسمع صوتي ومارد
مصباح آنة اصيرنلك ومارد
واخدمك ياترف بثنين ادية


همومي براسي لابسها كليتة
ومثلي من الفگر بايع كليتة
جعت ولساني من جوعي كليتة
رضيت اخرس ولاأرضه بعطية


امتحنتك ردت اجربنك صح اتحل
تشد جرحي واذا يشفة صحت حل
بعدني ماطحت يمك صحت حل
لو طايح صدﮒ شتسوي بية


زاد بگلبي شوگك وانتة قل بية
وصعد للراس حبك وانتقل بية
أحب شلون غيرك وانتة قلبي
وانة بگلبي أحبن مو بدية


يحلوة الزعل طول صاحبينة
بهجرچ عظم ماظل صاحي بينة
چنه برضه وچانت صحة بينة
زعلتي وزعلت الصحة علية


شتظن تلحگ علية الأوف لالا
بليل اوداع خدة اشتعل لالا
أگله ارجع يگلي انتهت لالا
لقد تم البعد غصبن علية


الزمان اشكال لابن آدم يراوي
واخذ مني قصص واكتب يرواي
أنة الربيتهم طلعوا يراوي
اكبروا وتعلمو عضات بية


مجرد شك اشكن هاشكشبيك
تكش بوجهي لكن هاشكشبيك
أشگ حلگة اليغثك ها شكو شبيك
واذا اغثك أشگ حلگي بدية


أرى جرح العشگ يكبر وارى الدم
دخت بيك وگمت أدعم واردم
مو للدوم احبنك ورة الدوم
واگول مقصر وحقك علية


عيوني غوشن ماشوف قفلن
وبس اعليك گلبي انقفل قفلآ
تريد اتروح قف لتروح قف لن
شگل للناس قد راح من ادية


وحگ ارموشك الحلوة وعينك
أنة بالشدة أوگفلك وعينك
لون بيدي لنصبنك وعينك
ملك تحكم على كل البرية


باد الحيل واتعس بيده هاية
وطلع ماكر حبيبي بي دهاية
سالمني وشبگني بيدة هاية
وبيده الثانية يأشر علية


إجيت تگلي خل نرجع بعدما
حكمت اعلة العشگ كلة بعدما
بعد ماصدﮒ بحچيك بعد ما
بعدما تگدر اتقشمر علية


المثلك كون يعرف قدر نفسة
وكون النافسك بالخير نفسة
بلال الشال صخرة انگطع نفسة
وانة الممنون اشيلنك بدية


إلك شفتين تكتل ولعني
واحسها بنار تحرﮒ ولعني
شني مسودن واگلك ولي عني
لو شارب نفط وجنون بية


الجگارة بنار دلالي ورثها
وعاين دنيتي وشنهي ورثها
أخذها الروح ترثيلك ورثها
ساعة انتة تنوح وساعة هية


من دمعي جرن نهرين وعيون
ولخليلك الف حراس وعيون
شلون خدود عندك ولفي وعيون
كبار ومحلة نظرتهن علية


أريد آخذ قسط راحة من الراح
بچيت وربعي سألوني من الراح
شجاني وماخذت عبرة من الراح
ولا بالجاي عبرة اتصير الية


افتحت صدري لسهامة من رماني
وشفتة وگلت مدري من رماني
بفيي وگعد ياكل من رماني
ويحسب للشتة شچم غصن بية


بين ظلوعي شلتك ماهملتك
وبقيت بجفن عيني ماهملتك
حسبالي الخيانة ماهي ملتك
لچن هسة اتضح كلكم سوية


بعد من نار شوگي من جمالك
يهالغاير غاير جمالك من جمالك
ثكيل الصحرة تشكي من جمالك
واذا تصعد جمل تنكسر هية


هلة ياللي على الفطرة هوانة
وينعشك لو يمر مرة هوانة
إذا تسأل على اليوفي هو آنة
أفزع باول صياحك علية


مثل مرجوحة بي رايح ورادود
ولولي بصوت لاناعي ورادود
من يمشي الحلو يمشي ورا دود
امن اشبگة الدود يتكوم علية


بابي المانهر چفك من اندﮒ
ودعاين آنه لو وكتي من اندﮒ
حنطة وطبعي اظل واگف من اندﮒ
أغزر بالوفي وبالذاتة ابية


يامن ما لغيرة الگلب يامن
رضة گلبك علينة انگول يامن
أنشدك إنتة امس مريت يامن
وراك الناس تتراكض خطية


كم من عمري خلصته وراكم
وگضيت اسنين بس اركض وراكم
بعت عمري ترة لحبكم وراكم
بدال المشترة تبيعون بية


المصايب أمنن بية ولاذن
بغيابك لانظر عندي ولاذان
وحشة غروب المفارﮒ ولاذان
العديلة تگول يقروها علية


منهو النكر عهده من عهد من
انهدم گلبك وگلبي منع هد من
عشگنة اتعرف عهدة من عهد من
گبل الاسلام هسه تخون بية


عطش گلبي بمحبتك ماي اتاني
وبعد ماظن ينطرك مايتاني
تعال وشوف حالي ميت آني
بس الروح گوة مچلبة بية


جرح گلبي شعمل بية وشدة
نزف محد گرب يمة وشدة
وگفت بكل مصيبة الهم وشدة
انعم الله اعليك محد گال الية


اذا نترك ودادك وانتنازل
إحرگ جدنة الاول وانتَة نازل
بعد روحي أحطك وانتة نازل
وسط گلبي واريد اقرب شوية


أصيلة الروح تنشد من خيالي
وافز مرات اخافن من خيالي
شكثر حاولت احذفك من خيالي
خيالي انحذف وانتة الضال الية

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&&

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://ashraf-ali.yoo7.com
 
مكتبة الأبوذيات
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات اشرف علي ملك الرياضة :: المنتـديات الادبيــة :: قسم الدارميات والابوذيات والزهيريات والمسجات-
انتقل الى: