مصيبة الطالبة من تعشكَـ الاستاذ
ومصيبة أستاذهها لو ما يعبرهها
هية بروحها تحركَـ حَركَـ وتذوب
وهوة مغلس وبنظراتة يسترهها
يمثل دور ابوهها ومايجيب الدور
ولا يكَدر يوصّلة ولا يدبرهها
لأن فارس أحلام تشوفة وتحس بيه
وتتمنى الحواجز يمة تكسرهها
وتكشفلة المشاعر واليصير يصير
بس عدهها قلق والقلق دمرهها
أخاف اتصارحة ومايفهم الموضوع
وأنوبة تِرد مكسور خاطرهها
من أول درس بالعشگ رسبت بيه
صفر عدهها النتيجة بهاي عاذرهها
درست دور ثاني ابرحلة العشاگ
ونفس ذاك المدرّس رد يشاطرهها
كتبها اتخورست والقلم صب دموع
ومناديل اصبحت جملة دفاترهها
الرّحْلة اتهزهزت چن هزّت الكاروك
طفلة الطالبة وهاجت مشاعرها
رفعت ايدهها ولأستاذها أذّن صوت
سؤال المختنگ بالروح جابرهها
شافاها المدرّس عرف شنهو تريد
السؤال مبيّن بدمعة نواظرها
سئلت والخجل مرسوم ع الوجنات
استاذ .. الّي يحب يا كلمة يذكرها ؟