الشاعر المرحوم عبد الحسين الحلفي _ يعجبني الجرح

يعجبني الجرح لو لاكة شمات يظم روحة بحيث يبين التم
وتعجبني السيوف بجف السباع يحمرها الخجل لو مالكت دم
أذا انت شفت لتكول ماشوف تحجي العين بلسانك تلعثم
شوف الفلح من تموت الورود بغير ورود هية تروح تشتم
بس شوف الورد لومات فلاح من أتشمة تلكة بعطرة مأتم
شوف أصعب وجه تقراه العيون لكن بالكلب بس الله يعلم
كلبي كزاز بس اتسحكة خسران أذا هو انكسر انت التصب دم
الحسب عقلة يحب صدكني يرتاح الحسب كلبة يحب صدكني يندم
لذلك اني أحب آدم ابو الكل بس ما حب أبو التفاحة آدم
حسب عقلك ياصاحي تشوف كلشي واضربلك مثل عن كلشي وشلون
اكويحجون من الصبح لليل وحرام ان جان تفهم شنهو يحجون
واكو ساكت وحلكة مخيط خياط وحجية شكد حلو بنظرات العيون
من أبزك بلحجي لاتزعل ارجوك اسمعني وكول شكرآ كول ممنون
ألابرة من تبز الثوب ياصاح قصدهة تخيط بشك اليشكون
تطلع الروح اكو شغلات مرات بس مرات هية تردلك الروح
أذية الباب من ينفتح للريح بس شلون لو بلسجن مفتوح
كلش مو حلو قباض الارواح وحلو كون بعدوك يقبض الروح
أبن آدم يضرب اللوح ابسامير لكن من يموت يشابكة اللوح
اكو من الفرح يبجي حيل مرتاح واكو شابع ضحك بس هو مذبوح
اكو كلشي مايملك عاش مرتاح واكو يملك الدنيا وعاش مسكين
اكو يعوفك سنين وجنهة ساعات واكو يعوفك دقايق جنهن سنين
اكو بلكبر بس مو موتة عاشو واكو مو بلكبر بس همة ميتين
اكو ميباوسونك بس يحبوك واكو رب المباوس بس شياطين
اكو جفة انكطع بس موش عباس واكو يذبحك شمر بس موش الحسين