أمــــــــــي ...

امي يارمز التفاني والصبر

ملحمة عشتي لنا كلك عبر

تسعة شهور حملتيني بوهن

شفتي ألوان العذاب بكل شهر

وبليلة الميلاد كانت فرحتك

في مهادي كنت انا لك يانهر

انتي ضميتيني في حضنك دفا

عن لهيب الصيف أو برد الدهر

تكبرين ونكبر احنا بدنيتك

كل شيبة في شعر راسك فخر

ان بكت عيني بكت عينك اسى

وان ضحك سني ضحكتيلي عمر

وان طلبتك حاجتن كلك عطا

انتي اكرم من على الدنيا ظهر

امي يانبع الوفا الله يديم

طلتك في ليلنا وانتي القمر

في صلاتك ياكثر ماتطلبين

ربي يحفظنا من عيون البشر

صرتي شمعة تحترق لأجلي انا

اهتدي فيها اذا طال السفر

وعند باب البيت ياما تحترين

ان تأخرت بظروفي واعتذر

ياحبيبة قلبي يايمة انا

آية ابوس تراب رجلك وافتخر

ارفعي راسك مدام اني قدرت

لك احقق امنياتك واختصر

فأخري فيني يايمة بينهم

جعل يفدونك قليلين القدر

ياحكاية عز سطرها الزمان

كل حرف فيها من دمعك سطر

رفرفي يابيرق الحب التليد

واقطفي من كل بستاني زهر

جعلي لاحجيت للبيت العتيق

يقبل الله دعوتي لج معتمر

ياسنا الفضة ولمعات الذهب

يارحيق المسك ياغيث المطر

يا أمان الروح يارجوى النفوس

ياشراعي لاانتشى موج الخطر

صعب يوصف لك شعوري كم بيت

قالهن قلبي بحبك بالشعر

بس شوفي يمة لامني طريت

اسمك دموعي بخدي تنتثر

الشاعر عايد المسيلم