من الباب ادخل مو من الشباچ اذا اتحبها صدگ اتقدملها
مثل اختك عرفها واحد من الناس ترضاهاعليها من يستغلها
تعيشها بحلم بي عائلة واطفال خاف الله ولك شتسولفلها
وحدة اثنين عندك هية يا ترتيب وعلى شكم وحدة ضاحك هم مثلها
وفندق لو گلب هذه العايش بيه ولا غرفة صدگ من تدخللها
كافي ما تحس يمكن ضميرك مات وين الفاتحة حتى اوصللها
ابوها شگد تعب رباها بالدمعات وامها حدبت بس تـكبرلها
وعلى الحاضر تجي ياحضرت الاستاذ ماتوصل شبر والله الكحلها
شمعة بيت هي وانتة نزوت ليل ولوگالوا شمس ماتسوة ظلها
احسبها عدل باچر وراك عتاب شتگلها اعتذر متصرفلها
وفكر تستقر لا تبقى ريشة بريح شباقي من العمر روحك تذلها
وما اگلك نبي وما اصيرن افلاطون بس المشكلة تگدر تحلها
هم مثلك چنت والعب على الحبلين! وما تسوة شفت من اصفنلها
تصح وحدة نعم مو زينة بس مرات اصابيعك لأن مو عدلة كلها
وتصح وحدة تعجبك لكن باللحظات وباچر من تجي يمكن تملها
وتصح وحدة اصيلة من الالف للياء وبس خيالها من يگدرلها
وتصح وحدة بعد ما تسمع الها الصوت بس مدوخ العالم خجلها
واخلاق وقيم تتوارث الاجيال مو غاية وطمع مستقبل الها
ومثل ورقة الشرف لو تحترگ بالنار لو تكتب قصيدة بس تجلها
ونصيحة من تحب تختار عدها احساس مو حلا وشكثر عدها