أريد أعلن حداد وللعشك ماعود
وأريد أنساك وأنسة البينك وبيني
وأشك دفتر غرامي خاطر أني أنساك
وأدير الوجه عنك من تلاكيني
ما ريدك بعد لو روحي أنت تصير
وما أريدك لون من أموت تحييني
ملح بعيوني أحطن وأنسى حتى النوم
أخافن من أنام طيوفك تجيني
أذا شافتك عيني وفرحت بملكاك
والله أتبرة منها وهاي مو عيني
وأذا صافحك جفي بحجة الخملان
أكص ثنين أدية يساري ويميني
وأذا كالولي حبك يجري بالشريان
ثق بالله أكطع كل شرايني
وأذا صاير شمس أني أبقى دوم بليل
وما ريد الضوة وبظلمة خليني
تذكر من لكيتك والعطش واليك
وكلتلي يمعود أترجاك أرويني
عصرت جفون عيني ووشليت دموع
وشربتك بدية وأنت تدريني
ومن مرني العطش صرت أنت جربة ماي
كصدتك متعني ومديت جفيني
وأنت بكل صلافة وبكل وكاحة عين
درت بجفوفي سم وردت تنهيني
تذب نفطك علية وأنة بية النار
وتتحمة على ناري وما تطفيني
وصرت محبس بديك وصرت بية تسوم
ساعة تبيع بية وساعة تشريني
أظل خصمك وأفضحك حتى من تموت
على كبرك أحطن بايك سنيني